Min aħna

Il-Leġjun ta’ Marija huwa moviment tal-lajċi mwaqqaf mis-Serv t’Alla Frank Duff f’Dublin (l-Irlanda). L-ewwel laqgħa fil-fatt saret nhar is-7 ta’ Settembru 1921 fit-8.00 ta’ filgħaxija. Immexxi dejjem mill-ispirtu tal-Vera Devozzjoni lejn Ommna Marija, mwassla lilna minn San Luigi Marija De Montfort, il-Leġjun ta’ Marija kompla jinxtered l-ewwel fl-Irlanda, fl-Ewropa, imbagħad mad-dinja kollha.

F’Malta, il-Leġjun ta’ Marija twaqqaf minn Monica Walsh, 15-il sena biss wara t-twaqqif tiegħu, fit-3 ta’ Novembru 1936 f’Tas-Sliema. Tajjeb illi nsemmu li l-Leġjun ġie approvat mill-Isqof fis-sena 1940. B’xorti tajba nistgħu ngħidu li llum il-Leġjun ta’ Marija huwa mxerred fil-parroċċi kollha ta’ Malta u t’Għawdex. F’Għawdex il-Leġjun ta’ Marija twaqqaf nhar it-22 ta’ Jannar 1950 minn Joseph Booker u Carmelo Formosa.

Eroj tal-Leġjun

Frank Duff

Frank Duff twieled Dublin, l-Irlanda, fis-7 ta’ Ġunju 1889. Daħal fiċ-Ċivil ta’ 18-il sena u ta’ 24 sena ingħaqad mas-Soċjetà ta’ San Vinċenz de Paul. Hemmhekk, huwa ġie mwassal għal impenn aktar profond lejn il-fidi Kattolika tiegħu u kiseb sensittività kbira għall-bżonnijiet tal-foqra u żvantaġġati.

Flimkien ma’ grupp ta’ nisa Kattoliċi u Fr. Michael Toher, mill-Arċidjoċesi ta’ Dublin, ifforma l-ewwel praesidium tal-Leġjun fis-7 ta’ Settembru 1921. Sa mewtu fis-7 ta’ Novembru 1980, mexxa l-estensjoni dinjija tal-Leġjun b’dedikazzjoni erojka. Huwa attenda l-Konċilju Vatikan II bħala osservatur lajk.

Ikklikkja fuq il-vleġġa biex tkompli.

Edel Quinn

Edel Quinn twieldet f'Kanturk, Co. Cork, l-Irlanda fl-14 ta' Settembru 1907. Bħala tifla l-ambizzjoni tagħha kienet li tidħol f'kunvent kontemplattiv iżda ma tħallietx tagħmel dan minħabba saħħitha. Ta’ 20 sena ngħaqdet mal-Leġjun ta’ Marija u kienet membru entużjast.

Imfixkla minn mard tul ħajjitha, fl-1936 Edel inħatret Mibgħuta għall-Afrika tal-Lvant tal-Leġjun ta’ Marija – f’pajjiżi bħall-Kenja, it-Tanżanija, iż-Żambja u l-Mawrizju. F’dan ix-xogħol taʼ pijunier iltaqgħet maʼ ostakli u għelbithom minkejja saħħitha u l-kundizzjonijiet ħorox. Kellha fidi kbira fl-imħabba ta’ Alla u fiduċja bla limitu fil-kura materna ta’ Marija Bambina.

Ikklikkja fuq il-vleġġa biex tkompli.

Alfie Lambe

Il-Qaddej ta’ Alla, Alphonsus Lambe (magħruf bħala Alfie), twieled f’Tullamore, l-Irlanda fil-festa ta’ San Ġwann Battista, il-Ġimgħa, 24 ta’ Ġunju 1932, waqt il-Kungress Ewkaristiku Internazzjonali f’Dublin.

Bħal San Ġwann kien prekursur – il-prekursur tal-Leġjun ta’ Marija.

Wara li għadda żmien ta' żgħożitu fin-novizzjat tal-Aħwa Nsara Irlandiżi, li kellu jħalli minħabba saħħa delikata, sab il-vokazzjoni tiegħu fil-Leġjun ta’ Marija, u nħatar Mibgħut fl-1953.

Ikklikkja fuq il-vleġġa biex tkompli.

Leġjunarji Prominenti f’Malta u Għawdex

F’Malta, il-Leġjun ta’ Marija twaqqaf minn Monica Walsh, 15-il sena biss wara t-twaqqif tiegħu fl-Irlanda, fit-3 ta’ Novembru 1936 f’Tas-Sliema.

Monica waslet Malta f’Settembru 1933 u mill-ewwel talbet il-permess biex tibda l-Leġjun f’Malta. Il-Leġjun ġie approvat mill-Isqof Maurus Caruana OSB fis-sena 1940 u l-ewwel presidenta tal-Leġjun kienet Tessie Agius. L-ewwel Direttur Spiritwali kien Dun Karm Psaila, il-Poeta Nazzjonali. Il-Praesidium kien jismu ‘Queen of Peace’ u kien jiltaqa’ fiż-żona tas-Sacro Cuor. Fis-sena 1937 ġiet tradotta t-tessera bil-Malti.

Fis-sena 1946, Joseph Booker ġie elett it-tieni President tal-Curia – f’elezzjoni fost erba’ kandidati. Għaxar snin wara l-bidu f’Malta, nhar it-22 ta’ Jannar 1950, saret l-ewwel laqgħa tal-Leġjun f’Għawdex. Dan kien wara li ta permess l-E.T. Mons .Giuseppe Pace, Isqof ta’ Għawdex u grazzi għall-isforzi ta’ Joseph Booker, Carmelo Formosa, u Richard Bisazza, li kien it-tielet President tal-Leġjun, elett fis-sena 1951. Illum, f’Għawdex, il-Leġjun hu stabbilit sew fil-parroċċi kollha tad-djoċesi.

Fis-sena 1954 tħabbar li l-membri attivi kienu qabżu l-2,000. Dik is-sena miet Joseph Booker. ‘Miet Qaddis’ kien irrimarka dwar dan Mons. Arċisqof Mikiel Gonzi.

Fis-sena 1957 il-Concilium approva l-ispiża ta’ 450 lira (Ingliża) biex jiġi stampat għall-ewwel darba l-Manwal bil-Malti. Ġew stampati 2,000 kopja. Din is-sena Carmelo Formosa ġie elett ir-raba’ President tal-Comitium, fost tliet kandidati.

Tliet snin wara, fis-sena 1960, il-ġurnal ‘Leħen is-Sewwa’ beda jiddedika faċċata kull xahar lil-Leġjun. Fis-sena 1963 saret l-ewwel ħarġa tal-‘Il-Vexillina’, fuljett bl-istencil ta’ kull xahar, b’16-il faċċata għall-Juniors, maħruġ minn Għawdex. Sentejn wara l-ħarġa bdiet tiġi stampata.

Sas-sena 1963, kien għad hemm 16-il parroċċa fejn ma kienx hemm Leġjun. Dik is-sena Edward Camilleri ġie elett President tal-Comitium (il-ħames President) minn fost żewġ kandidati. Fl- 1966, Edward Camilleri u Ġużeppi Bartolo bdew reviżjoni tal-Manwal bil-Malti.

Il-Concilium tal-Irlanda iwaqqaf kunsill ġdid fis-sistema tal-Leġjun – ir-Regia - fis-sena 1968. Dan kien jirrekjeda revizjoni oħra tal-Manwal, li tlesta bil-Malti fis-sena 1971.

Fis-sena 1969, George Pace ġie elett unanimament President tal-Comitium ta’ Malta (is-sitt President) . U George Pace reġa ġie elett f’Lulju 1981.

Fit- 18 ta’ Marzu 1974, Carmelo Formosa informa lir-Regia li d-dar 278, Triq San Pawl, il-Belt, ġiet imħollija lill-Arċisqof bil-kundizzjoniji li tintuża bħala headquarters tal-Leġjun ta’ Marija. Il-benefattur ta’ din l-opra kbira kien ix-Chev. John Francia, li kien miet fil-31 ta’ Jannar 1974. Is-sena ta’ wara, fl-1975, Edward Camilleri ġie reġa’ elett President tar-Regia.

Il-fundatur, Frank Duff imur għall-ħajja ta’ dejjem fis- 7 ta’ Novembru 1980. George Pace rega’ ġie elett President (it-tmien wieħed) fis-sena 1981. L-Arċisqof Mikiel Gonzi, sostenitur kbir tal-Leġjun, imut fit- 22 ta’ Jannar 1984.

Fl-ewwel laqgħa għaż-żgħażagħ li saret fid-Dar tal-Leġjun, il-Belt, attendew 70. Din saret f’Ġunju 1985.

Dun Karm Farrugia ġie nominat Direttur Spiritwali tar-Regia f’April 1986. F’Ottubru tal-istess sena, Icilio Ebejer inħatar il-president il-ġdid tal-kumitat lokali tal-PPC. Edward Camilleri reġa’ ġie elett President tar-Regia fis-sena 1987.

F’Awwissu 1988 il-Leġjun ingħata l-inkarigu li jieħu ħsieb il-quddies fuq it-TV. Fis-sena 2005 Alfred Sammut ġie elett President wara kontestazzjoni bejn żewġ membri. Meta għalaqlu t-terminu, John Francalanza ġie elett President tar-Regia. Wara ż-żewġ termini ta’ tlett snin, saret elezzjoni u kellna t-tieni Presidenta mara, Angela Buttigieg. Kenneth Abela ġie elett Preident f’ Awwissu 2023 meta għalaq it-terminu tagħha.

Tessie Aguis, President, 1940 – 1946

Joseph Booker, President, 1946 – 1951

Richard Bisazza, President, 1951 – 1957

Carmelo Formosa, President, 1957 – 1963

Edward Camilleri, President, 1963 – 1969 ; 1975 – 1981 1987 - 1993

George Pace, President, 1969 – 1975; 1981 – 1987, 1993 - 1999

Icilio Ebejer – President –, 1999 - 2005

Alfred Sammut, President – 2005 – 2011

John Francalanza – President – 2011 – 2017

Angela Buttigieg – President – 2017 – 2023

Kenneth Abela – President – 2023 –

Referenzi

L-Ewwel Ħamsin Sena tal-Leġjun ta’ Marija f’Malta – 23.04.40 – 23.04.1990
Joseph D. Booker , Appostlu tal-Leġjun ta’ Marija – Patri Guido Schembri OFM (ippubblikat 1981)
Leġjun ta’ Marija , 1950 – 2000.
Carmelo Formosa, Ħajtu u Ħidmietu – Dun Geoffrey G.Attard